Mae'r GIG yng Nghymru wedi gwneud cynnydd sylweddol o ran lleihau amseroedd aros a mynd i'r afael a'u hachosion yn strategol, yn ôl Archwilydd Cyffredinol Cymru, Jeremy Colman. Dywed ei adroddiad wrth Bwyllgor Archwilio'r Cynulliad bod rhai risgiau hysbys yn bodoli o hyd, ac y bydd angen eu rheoli'n ofalus er mwyn cyflawni a chynnal targed uchelgeisiol Llywodraeth Cynulliad Cymru, na ddylai unrhyw glaf, o fis Rhagfyr 2009 ymlaen, aros mwy na chwe mis o'r adeg y bydd y meddyg teulu yn ei atgyfeirio i gael triniaeth.

Mae'r adroddiad yn dilyn adroddiad Pwyllgor Archwilio'r Cynulliad: Amseroedd Aros y GIG, a gyhoeddwyd ym mis Mai 2005. Daw i'r casgliad bod Llywodraeth y Cynulliad wedi gwneud cynnydd wrth gyflawni holl o argymhellion y Pwyllgor Archwilio.

Mae'r adroddiad heddiw yn argymell dau welliant arall. Mae'n galw ar Lywodraeth y Cynulliad i gomisiynu gwaith i brofi cywirdeb data rhestrau aros; ac y dylai Llywodraeth y Cynulliad gynnwys amcanion tymor hwy yn ei waith cynllunio i gynnal yr amseroedd aros y tu hwnt i’w gynlluniau i ddarparu cydbwysedd rhwng gofyn a chynhwysedd erbyn mis Rhagfyr 2009.

Bydd Pwyllgor Archwilio'r Cynulliad yn trafod yr adroddiad hwn yn ei gyfarfod nesaf ar 6 Gorffennaf ac yn cymryd tystiolaeth gan Ann Lloyd, y Cyfarwyddwr Iechyd a Gwasanaethau Cymdeithasol yn Llywodraeth Cynulliad Cymru.

• Paratowyd yr adroddiad hwn ar gyfer Archwilydd Cyffredinol Cymru gan Swyddfa Archwilio Cymru.

• Mae'n dilyn adroddiad y Pwyllgor Archwilio: Amseroedd Aros y GIG, a gyhoeddwyd ym mis Mai 2005. Cyhoeddwyd adroddiad gwreiddiol yr Archwilydd Cyffredinol: Amseroedd Aros y GIG yng Nghymru ym mis Ionawr 2005.

• Mae Swyddfa Archwilio Cymru yn annibynnol ar y llywodraeth ac yn gyfrifol am archwilio tua £19 biliwn o wariant cyhoeddus blynyddol.

• Ei nod yw hybu gwelliannau fel y gall pobl Cymru gael budd o wasanaethau cyhoeddus atebol sydd wedi'u rheoli'n dda ac sy'n cynnig y gwerth gorau posibl am arian. Mae hefyd yn ymrwymedig i nodi a lledaenu arfer da ar draws y sector cyhoeddus yng Nghymru.

• Sefydlwyd Swyddfa Archwilio Cymru ym mis Ebrill 2005 trwy Ddeddf Archwilio Cyhoeddus (Cymru) 2004, a ehangodd swyddogaethau Archwilydd Cyffredinol Cymru ac a ganiataodd i staff o’r Comisiwn Archwilio yng Nghymru a’r Swyddfa Archwilio Genedlaethol yng Nghymru gael eu trosglwyddo i gyflogaeth dan Archwilydd Cyffredinol Cymru.