Mae'r adroddiad, a gaiff ei gyhoeddi heddiw, yn graddio'r Gymdeithas fel ardderchog o ran ei hymagwedd tuag at ddarparu tai, ei gwasanaeth rheoli tai ac wrth ddarparu ar gyfer pobl ag anghenion arbennig. Canfu hefyd fod trefniadau da ar waith o ran ei pherthynas â phreswylwyr a chyfle cyfartal a'i bod hefyd yn darparu gwasanaethau rhentu a gosod da.

Ystyriwyd bod gwasanaeth cynnal a chadw'r Gymdeithas yn dda hefyd ar y cyfan, gyda lefelau uchel o foddhad gan denantiaid. Er ei bod yn methu â chyflawni disgwyliadau allweddol o ran cynnal a chadw nwy, roedd y Gymdeithas wedi dechrau mynd i'r afael â'r mater hwn cyn yr arolygiad a bellach mae ganddi raglen drylwyr ar waith ar gyfer gwaith cynnal a chadw wedi'i raglennui sicrhau y cyrhaeddir Safon Ansawdd Tai Cymru.   

Mae'r adroddiad yn nodi sawl maes o arfer da yn cynnwys cydweithio â Chymdeithas Tai Cynon Taf a Chymdeithas Tai Rhondda er mwyn cynhyrchu 'Byw mewn Harmoni', taflen wybodaeth i denantiaid. Ymhlith enghreifftiau eraill o arfer da mae:

• Ceisio barn defnyddwyr gwasanaethau a'i defnyddio i wella gwasanaethau
• Cynllun cymorth tenantiaeth
• Alinio cynllunio gwasanaethau â chynllunio ariannol
• Cydweithio â grwpiau eraill, fel yr heddlu lleol, awdurdodau lleol a Chymdeithasau Tai eraill i hyrwyddo gwasanaethau sydd ar gael i denantiaid

Heddiw, dywedodd Jeremy Colman, Archwilydd Cyffredinol Cymru :
“Mae Cymdeithas Tai Pontypridd a'r Cylch yn cyrraedd safonau ardderchog mewn llawer o feysydd o'i gwasanaethau, ac mae'r cydweithio â Chymdeithasau Tai eraill, awdurdodau lleol a'r heddlu er mwyn darparu gwasanaethau i denantiaid i'w ganmol yn fawr.”

Nodiadau i Olygyddion:

• Cynhaliwyd yr arolygiad o Gymdeithas Tai Pontypridd a'r Cylch ym mis Mai 2005.

• Mae Cymdeithas Tai Pontypridd a'r Cylch wedi ennill ei phlwyf yn y gymuned ac mae'n rheoli 451 o gartrefi ym Mhontypridd a'r cylch.

• Mae Llywodraeth Cynulliad Cymru wedi penodi Swyddfa Archwilio Cymru i gynnal yr arolygiad o gymdeithasau tai yng Nghymru. Caiff y gwaith ei arolygu ei gynnal o dan Ddeddf Llywodraeth Leol 1998, fel y'i diwygiwyd gan Ddeddf Archwilio Cyhoeddus (Cymru) 2004

• Amlinellir y cwestiynau penodol am bob agwedd ar yr arolygiad yn fersiwn diweddaraf Cod Rheoliadol y Cynulliad ar gyfer Cymdeithasau Tai yng Nghymru. Gellir dod o hyd i hwn drwy glicio ar y cysylltiad canlynol: http://new.wales.gov.uk/topics/housingandcommunity/housing/publications/regulatorycodehas?lang=cy

• Mae Swyddfa Archwilio Cymru yn annibynnol ar y llywodraeth ac yn gyfrifol am archwilio tua £19 biliwn o wariant cyhoeddus blynyddol.

• Sefydlwyd Swyddfa Archwilio Cymru ym mis Ebrill 2005 drwy Ddeddf Archwilio Cyhoeddus (Cymru), 2004, a ehangodd swyddogaethau Archwilydd Cyffredinol Cymru ac a ganiataodd i staff o’r Comisiwn Archwilio yng Nghymru a’r Swyddfa Archwilio Genedlaethol yng Nghymru gael eu trosglwyddo i gyflogaeth Archwilydd Cyffredinol Cymru.

Diwedd

Am ragor o wybodaeth, cysylltwch â Rachel Harries (Swyddog Cyfathrebu a’r Cyfryngau) ar 02920 262 675 neu anfonwch e-bost at rachel.harries@wao.gov.uk