Rhestr Astudiaethau achos

Ymddiriedolaeth Gofal Iechyd Gwent

01/01/2008

Mae'r Meddyg Ymgynghorol wedi sefydlu Uwch Dîm Asesu Clinigol (ACAT), ac ef sy'n arwain y tîm. Sefydlwyd yr Uwch Dîm Asesu Clinigol ym mis Tachwedd 2006 ac mae'n cynnwys pump Uwch Aseswr sy'n Nyrsys Clinigol sy'n ymateb yn gyflym i atgyfeiriadau er mwyn atal achosion o dderbyn cleifion o'r gymuned a chartrefi gofal.

Gwneir atgyfeiriadau gan Feddygon Teulu, a phan gaiff unigolyn ei atgyfeirio, bydd nyrs yn ymweld â'r claf i gymryd hanes llawn a chynnal archwiliad manwl. Cynhelir profion diagnostig, yn cynnwys prawf gwaed ac ocsigen ac electrocardiogram yn syth yng nghartref y claf. Rhaid aros rhai oriau cyn cael y canlyniadau ac mae'r nyrs yn defnyddio'r amser hwn i gysylltu â'r gwasanaethau cymdeithasol neu'r tîm ail-alluogi os oes angen. Os bydd angen pelydr X, mae gan y tîm drefniant gyda'r adran radioleg yn Ysbyty'r Sir, Casnewydd, lle y rhoddir blaenoriaeth i gleifion yr Uwch Dîm Asesu Clinigol. Mae'r gwasanaeth yn gweithredu rhwng 8.00am ac 8.00pm yn ystod yr wythnos.

Darperir llywodraethu clinigol drwy'r Meddyg Ymgynghorol a Chofrestrydd Gofal Canolraddol arbenigol. Anogir nyrsys yr Uwch Dîm Asesu Clinigol i ofyn am eu cyngor os oes ganddynt unrhyw amheuaeth ynglyn â chlaf a gall y meddygon ymweld â chleifion yn y gymuned neu eu gweld mewn clinigau priodol a gynhelir yn rheolaidd.

Bu'r meddyg ymgynghorol hefyd yn ymwneud â'r gwaith o hysbysu meddygon teulu yn Nhorfaen am y dewisiadau amgen i dderbyn cleifion i'r ysbyty yn ogystal â chwarae rhan ym Mwrdd Llywio Gofal Canolraddol yr ardal. Mae'r Bwrdd, y mae ei aelodau'n cynnwys uwch swyddogion o'r Bwrdd Iechyd Lleol, yr Ymddiriedolaeth GIG, Gwasanaethau Cymdeithasol yr Awdurdod Lleol a rhwydwaith y sector gwirfoddol, wedi sicrhau bod yr Uwch Dîm Asesu Clinigol yn cyd-fynd ag amrywiaeth o wasanaethau yn y gymuned ac yn yr ysbyty ac y caiff ei ategu ganddynt.

Mae gwasanaeth yr Uwch Dîm Asesu Clinigol wedi helpu i leihau nifer y bobl a dderbynnir i'r ysbyty.

Er na chafwyd gwerthusiad llawn o effaith y gwasanaeth, nodwyd bod yr Uwch Dîm Asesu Clinigol wedi llwyddo i gynorthwyo 975 o'r 1208 o gleifion a atgyfeiriwyd rhwng mis Ionawr 2007 ac Ebrill 2008. Mae dros 85% o'r cleifion a welir dros 75 oed. Yn ystod y cyfnod y mae'r gwasanaeth wedi datblygu, mae nifer y cleifion sy'n wynebu oedi wrth drosglwyddo gofal wedi lleihau (ac eithrio cyfnod byr pan oedd nifer sylweddol o gleifion yn aros am asesiad ar gyfer gofal iechyd parhaus).

Canfu arolwg o gleifion yn dilyn cyfnod peilot y gwasanaeth foddhad uchel ymhlith cleifion. Rhoddwyd cyfle i Feddygon Teulu adolygu'r gwasanaeth ac roeddent yn gadarnhaol iawn. Roeddent yn arbennig o hoff o'r amserau ymateb cyflym, y prosesau cyfathrebu effeithiol a'r boddhad uchel ymhlith cleifion. Ymhlith pryderon y meddygon teulu am y gwasanaeth roedd diffyg gwasanaeth ar y penwythnos a'r tu allan i oriau, a'r llwythau gwaith cynyddol ar gyfer meddygon teulu o gymharu â chleifion a dderbynnir i'r ysbyty.

Pwyntiau dysgu allweddol: 

• Mae llawer o gleifion oedrannus wedi derbyn lefel uchel o asesu clinigol a thriniaeth â'r gymuned drwy gael eu derbyn i'r ysbyty;
• Gall meddyg ymgynghorol sy'n gweithio yn y gymuned gefnogi meddygon teulu a darparu lefel briodol o lywodraethu clinigol; 
• Mae fframwaith aml-asiantaeth o ymrwymiad a fframwaith a rennir o wasanaethau yn hanfodol i effeithiolrwydd model 'uned asesu feddygol rithwir'.