Rhestr Astudiaethau achos

Cyngor Sir Fynwy

01/10/2008

Mae gan y cyfleuster 19 o welyau i gleifion mewnol ac mae meddygon teulu Sir Fynwy yn darparu'r gofal meddygol. Mae yna hefyd Uned Mân Anafiadau o dan arweiniad nyrsys, Tîm Gofal Cymunedol, Tîm Ailalluogi, ysbyty dydd a gwasanaethau dydd, ysbyty dydd iechyd meddwl i bobl hyn, sesiynau ffisiotherapi i gleifion allanol a sesiynau Therapi Galwedigaethol, adran pelydr-X, timau nyrsio cymunedol ac amrywiaeth o wasanaethau i gleifion allanol a chlinigau iechyd cymunedol.

Mae gan y cynllun hwn gyllideb gyfun a rheolwr gwasanaeth sy'n rheoli'r Ymddiriedolaeth, y BILl a staff y Cyngor. Fel rhan o'r cynllun hwn, gall Nyrsys Cyswllt Rhyddhau ddefnyddio cyllidebau gwasanaethau cymdeithasol. Er mai ar gam datblygu cynnar y mae'r cyfleuster, sy'n golygu na ellir gwerthuso ei effaith eto, bu gwelliannau proses o ran gwasanaethau Ailalluogi a gwasanaethau eraill. Mae tîm ar y cyd Dyffryn Mynwy wedi adolygu'r gweithrediad ac wedi llunio cynllun busnes i'w gyflwyno gerbron y Bwrdd Iechyd Lleol yn ystod ail hanner 2007 i helpu'r cyfleuster i wella ei weithrediad a'i ganlyniadau.

Prif fuddiannau canfyddedig trefniadau Dyffryn Mynwy yw'r ffaith y caiff tîm amlddisgyblaethol cadarn ei ddatblygu sy'n gweithio o dan strwythur rheoli cyffredin o fewn un cyfleuster. Cynhelir cyfarfod tîm amlddisgyblaethol wythnosol ar y ward a rhydd trefniant rheoli unedig y gallu i'r rheolwr newid arfer er mwyn sicrhau bod cleifion yn y ganolfan, yn hytrach nag yn cael eu trosglwyddo rhwng adrannau a galwedigaethau. Hefyd, mae'r arweinyddiaeth gyffredin yn ddefnyddiol iawn o ran datblygu cysyniad o un llwybr ac annog staff i weithio y tu allan i ffiniau caeth.

Roedd y broses o ddatblygu cytundeb 'Adran 33' yn broses hir yn rhannol oherwydd roedd adeiladu'r cyfleuster yn brosiect Menter Cyllid Preifat. Dywedodd yr Awdurdod Lleol a'r BILl wrthym mai'r gwersi a ddysgwyd wrth ddatblygu cytundeb 'Adran 33' yw'r angen i sicrhau:

• bod trefniadau Bwrdd Partneriaeth cadarn ar waith megis sefydlu'r Bwrdd Partneriaeth amlasiantaeth i Ddyffryn Mynwy, y dywedwyd wrthym ei fod wedi gweithredu'n agored iawn ac iddo fod yn hanfodol wrth gynnal hygrededd y trefniant ar draws sefydliadau unigol o fewn y bartneriaeth; 
• bod cydnabyddiaeth nad yw cytundebau Adran 33 ffurfiol ynddynt hwy eu hunain yn newid arfer heb weledigaeth glir a rennir ac arweinyddiaeth gyffredin;
• y gall y cytundeb ffurfiol ddarparu llinell sylfaen bwysig ar gyfer integreiddio ond bod angen amser i'r buddiannau ddod i'r amlwg a bod angen edrych yn ofalus ar arferion, gan gynnwys cydberthnasau a'r llwybr gofal; 
• ceir y cyngor gorau gan unigolion sydd â lefel uchel o arbenigedd a meddylfryd cadarnhaol. Tra bod y fframwaith cyfreithiol yn ddefnyddiol ni fydd yn datrys unrhyw faterion o ran cydberthnasau; 
• bod systemau ariannol cadarn ar waith i ategu'r broses o reoli gwasanaethau integredig er mwyn galluogi gwell hyblygrwydd wrth ddefnyddio adnoddau a rennir; 
• byddwch yn cyfathrebu â staff drwyddi draw. Mae hyn yn cynnwys newidiadau rheolaidd i reolaeth staff, a byddant yn poeni am golli eu hunaniaeth broffesiynol ac angen deall beth yw'r disgwyliadau o ran eu practis; 
• bod y broses o weithredu asesiadau unedig yn allweddol o ran cyflawni buddiannau hirdymor cytundeb 'Adran 33'; 
• ni fyddwch yn anghofio beth rydych yn ceisio'i gyflawni; h.y. gwasanaeth integredig sydd mewn gwell sefyllfa i ddiwallu anghenion lleol. Roedd pwysigrwydd cadw ac adnewyddu gweledigaeth gyffredin ac egwyddorion o ran sut y dylai'r gwasanaeth weithredu yn allweddol i ddatblygiad llwyddiannus y prosiect.