Roedd yr adroddiad yn amlygu pryderon Jeremy Colman am nifer yn y GIG sy'n parhau i gofnodi diffygion ariannol. Dywedodd: ‘Yn ddi-au, mae'r heriau y mae'r GIG yn eu hwynebu yng Nghymru yn galw am safonau uchel iawn o reolaeth ariannol. Yn ôl yr arfer, ond yn enwedig yn y misoedd sydd i ddod, rwy'n bwriadu cefnogi cyrff iechyd wrth iddynt ymdrechu i wynebu'r heriau hyn a chyrraedd safonau gofal iechyd newydd.’

Ymhlith y prif negeseuon o'r adroddiad, sy'n amlygu meysydd ar gyfer gwella mae'r canlynol:

• er bod gweithdrefnau caffael yn gwella, dylai cyrff wneud mwy o ddefnydd o Gwerth Cymru i gael gwell gwerth am arian cyhoeddus;
• gall sefydliadau wella'r ffordd y maent yn paratoi ceisiadau am grant Ewropeaidd;
• mae cyrff a archwilir yn parhau i wella eu perfformiad talu, er bod angen mwy o waith ar rai agweddau o hyd;
• Mae systemau e-gaffael ac e-grantiau yn rhoi gwell gwybodaeth ariannol i Lywodraeth Cynulliad Cymru, ond gall wneud mwy i sicrhau eu buddiannau llawn;

Nododd yr Archwilydd Cyffredinol hefyd y risgiau a'r cyfleoedd mewn oes o newid cyfansoddiadol a chorfforaethol dwys, sydd wedi trawsnewid y broses lywodraethu a gweinyddu ariannol yng Nghymru. Mae'r newidiadau wedi gwneud arian cyhoeddus Cymru yn fwy annibynnol ar San Steffan, ac wedi creu Cronfa Gyfunol Cymru.

Heddiw, dywedodd Jeremy Colman, Archwilydd Cyffredinol Cymru:
‘Mae safonau cyffredinol gonestrwydd a rheolaeth ariannol llywodraeth ganolog a chyrff y GIG yng Nghymru yn uchel a lle mae materion wedi codi, gweithredwyd ar fy argymhellion. Mae gan y cyrff cyhoeddus hyn drefniadau rhesymol i gael y gwerth gorau am arian cyhoeddus ond rhaid i gynllunio ariannol, yn enwedig yn y GIG, fynd y tu hwnt i'r sefyllfa uniongyrchol i gynlluniau tymor canolig a hirdymor.
Edrychaf ymlaen at gydweithio â'r cyrff yr wyf yn eu harchwilio i gadw gwasanaethau cyhoeddus yn atebol a gwella'r gwasanaethau y mae cymaint yn dibynnu arnynt.’