Datganiadau i'r wasg

Mynegwch eich barn ar wasanaethau iechyd meddwl yng Nghymru

14/08/2009

Swyddfa Archwilio Cymru yn lansio arolwg i bobl sy'n defnyddio gwasanaethau iechyd meddwl

Mae Swyddfa Archwilio Cymru am glywed gan unrhyw un rhwng 18 a 64 oed sydd wedi defnyddio gwasanaethau iechyd meddwl a ddarperir gan y GIG neu'r gwasanaethau cymdeithasol yng Nghymru yn ystod y flwyddyn ddiwethaf. Mae'r Swyddfa'n cynnal archwiliad i ganfod faint o gynnydd sydd wedi'i wneud ers yr adolygiad mawr o wasanaethau iechyd meddwl i oedolion a gynhaliwyd gan yr Archwilydd Cyffredinol yn 2005.

Mae'r tîm arolygu am i unigolion 18-64 oed rannu eu barn ar yr hyn sy'n gweithio'n dda yn eu tyb hwy, a'r hyn sydd angen ei newid, drwy arolwg dienw sy'n gyflym ac yn hawdd i'w gwblhau. Mae cymryd rhan yn yr arolwg hwn yn wirfoddol ac os bydd defnyddwyr gwasanaethau yn dewis peidio â chymryd rhan ni fydd yn effeithio ar y gofal y maent yn ei dderbyn.

Gall pobl gael gafael ar yr arolwg ar-lein drwy ymweld â www.wao.gov.uk. Fel arall, gallant gael gafael ar fersiwn papur o'r arolwg drwy ffonio 02920 320508 neu drwy ysgrifennu at Steve Ashcroft yn 24 Heol y Gadeirlan, Caerdydd, CF11 9LJ.

Er bod y tîm yn croesawu sylwadau gan unrhyw un, ni all ymdrin ag achosion unigol pobl na rhoi cyngor arnynt. Ni all ychwaith ymateb i wybodaeth a gyflwynir, oni bai ei fod yn teimlo bod angen gwneud hynny.

Bydd Swyddfa Archwilio Cymru yn defnyddio canfyddiadau'r arolygon hyn, ynghyd â gwaith arall o'r arolwg, i roi gwybod i sefydliadau, megis Llywodraeth Cynulliad Cymru, y GIG a chynghorau, beth y maent yn ei wneud yn dda, a beth sydd angen iddynt ei wella. Mae'r arolwg ar agor tân 26 Medi 2009.

Nodiadau i Olygyddion:

• Rydym yn edrych am farn unigolion rhwng 18-64 oed yn unig ar gyfer yr astudiaeth hyn - sydd yn ffocysu ar ddarpariaeth iechyd meddwl i oedolion. Mae Swyddfa Archwilio Cymru eisioes wedi archwilio gwasanaethau iechyd meddwl plant a phobl ifanc ac efallae y caiff gwaith pellach ei wneud yn y dyfodol ar gyfer pobl hyn.
• Mae Swyddfa Archwilio Cymru yn annibynnol ar y llywodraeth ac yn gyfrifol am gynnal archwiliad blynyddol o tua £20 biliwn o wariant cyhoeddus blynyddol. Ei chenhadaeth yw hyrwyddo gwelliant, fel bod pobl Cymru yn cael budd o wasanaethau cyhoeddus atebol sydd wedi eu rheoli'n effeithiol ac sy'n cynnig y gwerth am arian gorau posibl Mae hefyd yn ymrwymedig i nodi a lledaenu arfer da ym mhob rhan o'r sector cyhoeddus yng Nghymru.
• Sefydlwyd Swyddfa Archwilio Cymru ym mis Ebrill 2005 drwy Ddeddf Archwilio Cyhoeddus (Cymru) 2004, a ehangodd swyddogaethau Archwilydd Cyffredinol Cymru ac a alluogodd staff o'r Comisiwn Archwilio yng Nghymru a'r Swyddfa Archwilio Genedlaethol yng Nghymru i gael eu trosglwyddo i gyflogaeth Archwilydd Cyffredinol Cymru.