Mae Awdurdod Heddlu De Cymru yn 'perfformio'n ddigonol' ac mewn sefyllfa gadarn i wella ymhellach
17/06/2010
Mae Awdurdod Heddlu De Cymru'n 'perfformio'n ddigonol' ar y cyfan, yn ôl adroddiad newydd a gyhoeddwyd heddiw gan Arolygiaeth Cwnstabliaeth Ei Mawrhydi a Swyddfa Archwilio Cymru. Mae'n perfformio'n dda ym meysydd craffu ar berfformiad ac ymgysylltu â chymunedau ac mae mewn 'sefyllfa gadarn i wella ymhellach'.
Canfu'r arolygwyr fod Awdurdod Heddlu De Cymru wedi datblygu dull mwy cadarn o arwain dros y pum mlynedd diwethaf a bod perthynas fwy effeithiol, adeiladol a heriol bellach gyda Heddlu De Cymru.
Mae'n cydnabod y pwysau y mae'r heddlu yn eu hwynebu o ran adnoddau ac yn ariannol ac mae wedi cymeradwyo Prosiect Diwygio - adolygiad eang ac uchelgeisiol o'r ffordd y caiff De Cymru ei blismona er mwyn sicrhau bod gwasanaethau o ansawdd yn cael eu cynnig i'r cyhoedd gyda'r adnoddau sydd ar gael.
Mae Awdurdod Heddlu De Cymru yn cynnwys 19 o aelodau (10 cynghorwr ac 9 aelod annibynnol) ac mae'n gyfrifol am sicrhau heddlu effeithlon ac effeithiol i Dde Cymru ac am ddwyn y Prif Gwnstabl i gyfrif.
Dywedodd John Herniman, Partner Swyddfa Archwilio Cymru, heddiw:
"Mae perfformiad Awdurdod Heddlu De Cymru'n ddigonol, ar y cyfan, ond mae wedi perfformio'n dda o ran ei rôl graffu ac ymgysylltu â chymunedau. Mae'r Awdurdod wedi gwella'n amlwg mewn nifer o feysydd dros y pum mlynedd diwethaf - gyda'i ddull mwy cadarn o arwain a dealltwriaeth well o reoli strategol a pherfformiad. Mae mewn sefyllfa gref i wella hyd yn oed ymhellach - yn enwedig os bydd yr Awdurdod yn llwyddo i reoli'r pwysau ariannol y mae'n eu hwynebu a chyflawni'r amcanion uchelgeisiol sydd wedi'u nodi yn ei raglen newid trawsnewidiol - Prosiect Diwygio."
Ymhlith y cryfderau mae'r canlynol:
- Mae'r Awdurdod wedi newid ei ddull rheoli strategol yn ddiweddar ac wedi cytuno ar ddatblygiad newydd gyda'r Prif Gwnstabl o ran cyflawni ei weledigaeth. Y newid allweddol yw bod y strategaeth wedi'i hymestyn i greu proses gynllunio a gweledigaeth bum mlynedd ar gyfer plismona De Cymru. Mae'r cynllun wedi'i osod yn erbyn cyfres o fesurau plismona i ymestyn yr Heddlu'n effeithiol a gwella hyder y cyhoedd.
- Mae'r Awdurdod yn dangos dulliau gweithredol ac effeithiol o reoli perfformiad ac mae wedi gweld gwelliannau amlwg yn y pum mlynedd diwethaf. Mae'r broses o bennu targedau yn helpu i sbarduno gwelliannau. Dangosir hyn gan y gostyngiad mewn trosedd, y cynnydd yn nifer y troseddau a gaiff eu datrys a'r ansawdd data gwell. Mae'r Awdurdod wedi datblygu Strategaeth Ymgysylltu â'r Gymuned effeithiol er mwyn helpu i sicrhau a deall safbwyntiau pobl leol am flaenoriaethau plismona a'u hanghenion penodol. Mae'n ymgysylltu â grwpiau sydd wedi'u hymyleiddio a grwpiau agored i niwed yn ogystal â chymunedau Pobl Dduon a Lleiafrifoedd Ethnig.
Ymhlith y meysydd ar gyfer gwella mae'r canlynol:
- Bydd llwyddiant Prosiect Diwygio yn dibynnu ar arweiniad a mewnbwn yr Awdurdod i sicrhau bod yr Heddlu'n defnyddio ei holl adnoddau yn effeithlon ac yn effeithiol. Mae angen i'r Awdurdod sicrhau ei fod yn rhagweld y bydd amgylchiadau'n newid a'i fod yn gweithredu'n unol â hynny er mwyn ymateb i heriau'r dyfodol.
- Mae'r Awdurdod wedi datblygu ei allu i ddylanwadu ar ganlyniadau perfformiad drwy sefydlu'r Panel Craffu fel rhan o'r Grwp Archwilio a Chraffu. Mae angen i'r Awdurdod sicrhau y bydd y broses graffu yn datblygu ac yn aeddfedu ac y bydd ei heffaith yn glir.
- Dylai'r Awdurdod bellach wneud defnydd llawn o Broffiliau Gwerth am Arian Arolygiaeth Cwnstabliaeth Ei Mawrhydi er mwyn asesu gwerth am arian yn yr Heddlu mewn modd effeithiol. Byddai hyn yn helpu'r Awdurdod i fesur sut y mae'r Heddlu yn cymharu â heddluoedd eraill er mwyn ei helpu i ddarparu gwerth gwell am arian, mwy o gynhyrchiant a dyrannu adnoddau'n well. Yn dilyn yr adroddiad heddiw, bydd Awdurdod Heddlu De Cymru'n cynllunio beth sydd angen iddo ei wneud i wella ei berfformiad yn y meysydd a nodwyd.
Mae copïau o'r adroddiad ar gael gan Awdurdod Heddlu De Cymru neu ar wefan Arolygiaeth Cwnstabliaeth Ei Mawrhydi yn http://www.hmic.gov.uk/INSPECTIONS/Pages/PoliceAuthorityInspections.aspx ac ar wefan SAC yn www.wao.gov.uk
Nodiadau i olygyddion
- Mae Awdurdod Heddlu De Cymru yn un o'r 43 o awdurdodau'r heddlu yng Nghymru a Lloegr. Mae'n gyfrifol am sicrhau heddlu effeithlon ac effeithiol ar gyfer De Cymru ac am ddwyn y Prif Gwnstabl i gyfrif.
- Mae arolygiad o awdurdod heddlu yn darparu adroddiad syml mewn ffordd syml ar ba mor dda y mae pob awdurdod heddlu yn perfformio. Mae'n annog awdurdodau'r heddlu i ganolbwyntio ar welliant parhaus ac yn darparu her annibynnol gadarn i ysgogi newid cadarnhaol. Yn y pen draw, mae'n ymwneud â gweithio i wella ansawdd y gwasanaethau a ddarperir i bobl leol gan awdurdodau'r heddlu.
- Mae Swyddfa Archwilio Cymru yn ymdrin â phob sector o'r llywodraeth, ac eithrio'r rhai a gedwir i lywodraeth y DU.
- Mae Archwilydd Cyffredinol Cymru, fel pennaeth Swyddfa Archwilio Cymru, naill ai'n archwilio cyrff megis Llywodraeth Cynulliad Cymru a'r Gwasanaeth Iechyd Gwladol yn uniongyrchol, neu, yn achos llywodraeth leol, yn penodi archwilwyr i wneud hynny.
- Ei gwaith yw hyrwyddo gwelliannau fel y gall pobl Cymru gael budd o wasanaethau cyhoeddus atebol sydd wedi'u rheoli'n dda ac sy'n cynnig y gwerth gorau posibl am arian.
- Gellir cael rhagor o wybodaeth am Swyddfa Archwilio Cymru yn: www.wao.gov.uk
- Mae Arolygiaeth Cwnstabliaeth Ei Mawrhydi yn arolygiaeth annibynnol sy'n arolygu gwasanaethau plismona er budd y cyhoedd ac yn archwilio'n drwyadl effeithiolrwydd heddluoedd ac awdurdodau er mwyn mynd i'r afael â throsedd a therfysgaeth, gwella'r system cyfiawnder troseddol a chodi hyder.
- Gellir cael rhagor o wybodaeth am Arolygiaeth Cwnstabliaeth Ei Mawrhydi yn: http://www.hmic.gov.uk