Yr Amgylchedd

Cyngor Bro Morgannwg

01/03/2007

Efallai na fydd plant mewn sefyllfa i leihau'r defnydd o ynni domestig drwy newidiadau i adeiladwaith neu wasanaethau eu cartrefi. Fodd bynnag, mae Energy Kids yn gweithio ar y sail y gall plant, drwy newid eu hymddygiad eu hunain, weithredu fel llysgenhadon a lleihau'r defnydd o ynni (er enghraifft, drwy ddiffodd setiau teledu a chynnyrch trydanol arall ar ôl eu defnyddio).

Ar hyn o bryd mae'r cynllun ar waith yng Nghynghorau Dinas Casnewydd, Bro Morgannwg a Chaerdydd, a chaiff ei gyflawni drwy drefniadau partneriaeth rhwng y cyngor perthnasol ac Asiantaeth Ynni De-ddwyrain Cymru.

Mae staff yr asiantaeth yn rhoi cyflwyniad awr o hyd i blant ysgol rhwng saith ac 11 oed ac yn trafod y meysydd canlynol:

• ffurfiau ynni (ee, nwy, glo, olew);
• effeithiau defnyddio tanwydd ffosil i gynhyrchu ynni;
• yr amrywiaeth o ffyrdd o ddefnyddio ynni;
• dulliau o leihau'r defnydd o ynni; a
• chynhyrchu ynni o ffynonellau adnewyddadwy.

Caiff plant sy'n cymryd rhan hefyd eu hannog i gwblhau Gwiriad Ynni Cartref gyda'u rhieni. Ar ôl derbyn y rhain bydd yr Asiantaeth yn rhoi adroddiad i'r teulu yn nodi:

• technegau ar gyfer gwneud eu cartrefi yn fwy effeithlon o ran ynni; a
• grantiau effeithlonrwydd ynni y mae'r cartref yn gymwys i'w derbyn.

Wrth gysylltu'r plant a'u teuluoedd gyda ffynonellau ariannu megis y HEES, nod Energy Kids yw mynd i'r afael â thlodi tanwydd a'r anfanteision cysylltiedig a brofir gan y plant hynny sy'n byw mewn tlodi tanwydd.

Cost y cynllun yw £98 a TAW am ddau gyflwyniad awr o hyd. Mae'r Asiantaeth Ynni yn gweithredu system disgownt o hyd at £50 yn dibynnu ar nifer y Gwiriadau Ynni Cartref sy'n deillio o'r cyflwyniadau. Penderfynodd Adran Dai Cyngor Dinas Casnewydd ddefnyddio rhan o'i chyllideb effeithlonrwydd ynni domestig i roi cymhorthdal llawn i'r cynllun ym mhob un o'i 40 o ysgolion yn y cyngor. Mae Bro Morgannwg yn rhoi cymhorthdal i'r 10 ysgol gyntaf sy'n gwneud cais i gymryd rhan yn y cynllun, ond rhaid i'r ysgolion sy'n weddill sy'n dymuno cymryd rhan ariannu'r cynllun yn uniongyrchol.